ஸ்ரீ நாராயணீய மஹாத்மியம் !!

ஹரே கிருஷ்ணா 🙏🏻🙏🏻

ஸ்ரீ நாராயணீய மஹாத்மியம் !!

குருவாயூர் என்றாலே கூடவே நினைவுக்கு வருபவர் ‘நாராயணீயம்’ எழுதிய மேல்பத்தூர் நாராயண பட்டதிரி ஆவார். 

குருவாயூர் ஸ்ரீ கிருஷ்ணனை முன்னிறுத்தி, பாகவதத்தின் சாரமாக, வட மொழியில் பக்தி சொட்டச் சொட்ட எழுதப்பட்ட கிருஷ்ண காவியமே ‘நாராயணீயம். 

பரசுராம ஷேத்திரம் என்ற புராணப் பெருமையுடன் திகழும் கேரள மாநிலத்தில் உள்ளது குருவாயூர்.

அங்கு இறையருளால் இளம் பிராயத்திலேயே அனைவரும் அதிசயக்கும் படியான அறிவு, ஆற்றல், பாண்டித்யம் பெற்றுத் திகழ்ந்தார் பட்டதிரி.

அச்சுத பிஷரோடி இவரது குரு.. 

தனக்கு இலக்கணம் போன்றவற்றைக் கற்றுக்கொடுக்கும் குரு – வாதரோகம் என்ற நோயினால் கஷ்டப்படுவதைக் கண்டார் பட்டதிரி. 

குருவிற்கு குரு தட்சணை அளிக்கும்

நேரமும் வந்தது. 

தமது நன்றிக் கடனாக குருவைத் தொற்றியுள்ள நோய் அவரை விட்டு விலகி தன்னைப்பற்றிக் கொள்ளட்டும் என்று கடவுளிடம் மன்றாடி வேண்டிக்கொண்டு தானே வலிய வர வழைத்துக் கொண்டார்.

துஞ்சத்து எழுத்தச்சன் மலையாள மொழியில் அக்காலத்தில் பிரபல கவிஞராக விளங்கியவர். 

இளமைப் பருவத்தில் இருந்த அந்த நோய் நீங்கும்பொருட்டு இவரை அணுகினார் பட்டதிரி. 

அவர் அறிவுறுத்தலின்படி, ஸ்ரீ குருவாயூர் தலத்திற்கு வந்து ஸ்ரீ குருவாயூரப்பன் சந்நிதியில் ஸ்ரீமத் பாகவத சரித்திரத்தை வடமொழி ஸ்லோகங்கள் மூலம் விளக்கிக் கூறி வழிபட்டுத் துதி செய்தார். 

நோயின் தாக்கத்தினால் கைகள் எழுத முடியாத நிலையில் பட்டத்திரி சொல்லச் சொல்ல அவரது தம்பி ஓலைச்சுவடியில் எழுதி நமக்கு அளிக்கப்பட்டதே ஸ்ரீ மந் நாராயணீயம் என்னும் வரப்பிரசாதம் ஆகும்.

1034 வடமொழி சுலோகங்களால் ஆனது ஸ்ரீமந்நாராயணீயம். 

குருவாயூரப்பன் சந்நிதியில் தினமும் பத்து ஸ்லோகங்கள் வீதம் (ஒரு தசகம்) 100 தசகங்களில் நாராயணீயத்தை பாடி முடித்தார் நாராயண பட்டதிரி. 

அவ்வாறு பாடி பூர்த்தி செய்து குருவாயூர் கிருஷ்ண பகவான் பாதத்தில் சமர்ப்பித்தார். 

அவரது பக்திக்கு கட்டுண்ட ஸ்ரீகுருவாயூரப்பன் அவ்வப்போது தன் தலை அசைப்பின் மூலம் அவரது ஸ்தோத்ரங்களை அங்கீகாரம் செய்தாராம். 

அதுவும் பிரகலாத சரித்திரத்தை, பட்டதிரி வர்ணிக்கும்போது மூலஸ்தானத்திலிருந்து சிங்கத்தின் கர்ஜனைக் கேட்டதாம். 

(நரஸிம்ஹராகக் காட்சியளித்ததாகவும் கூறப்படுவது உண்டு).

புகழ்பெற்ற ஸ்ரீகுருவாயூரப்பன் ஆலயத்தில் நடைபெறும் வருடாந்திர உற்சவ தினங்களில் ஒன்றாக ஒவ்வொரு ஆண்டும் கார்த்திகை மாதம் 28 ஆம் தேதி ஸ்ரீமந் நாராயணீய தினம் என்று விசேஷமாக கொண்டாடப்படுகின்றது. 

1586ஆம் ஆண்டு விருச்சிகம் 28ஆம் நாளில் ஸ்ரீ பட்டதிரி அவர்கள் ஸ்ரீமந்நாராயணீய காவியத்தை கிருஷ்ணன் பாதங்களில் சமர்ப்பித்து அனைவருக்கும் பெருமை கொடுத்த நாள் இது.

 100 வது தசக பாடல்களில், குருவாயூரப்பனின் தலை முதல் கால் வரை (கேசாதி_பாதம்) வர்ணித்துள்ளார் பட்டத்திரி.

அப்போது குருவாயூரப்பனே அவருக்கு நேரில் தரிசனம் அளித்தார். 

அன்று பட்டத்திரியை பீடித்து இருந்த வாதரோகமும்_நீங்கியது. 

இந்த தினத்தைத்தான் குருவாயூரப்பன் ஆலயத்தில் பிரதி_வருடம்_கார்த்திகை 28ம் தேதியன்று 'நாராயணீய தினம்' என்று தேவஸ்வம் சார்பில் கொண்டாடுகிறார்கள். 

அன்று ஆலயத்தில் பட்டத்திரி அமர்ந்து பாடிய இடத்தில் சிறப்பான கோலங்கள் இட்டு, விளக்கேற்றி, 

ஸ்ரீ நாராயணீயத்தைப் பாராயணம் செய்வார்கள். 

நாராயணீயத்தைப் பற்றி விளக்க உரை, சொற்பொழிவுகள் நடைபெறும் இந்நிகழ்ச்சியில் பங்கேற்பதற்கு முக்கியமாக நாள்பட்ட நோயினால் அவதிப்படுபவர்கள் ஆலயத்தில் கூடி குருவாயூரப்பனைதரிசனம் செய்து பலன் பெறுவார்கள். 

பட்டத்திரி_வாழ்ந்த_மேல்பத்தூர் இல்லத்திலும் இந்நாள் விசேஷமாக அனுஷ்டிக்கப்படுகிறது.

ஜெய் ஸ்ரீராம்

ஸர்வம் கிருஷ்ணார்பணமஸ்து.